Kad se oni brod odlipija od maloga mula, kad su trumbete zaškrikale, kad je bumbal s kampanela zagrmija, kad su arju užgale baklje a umorna zraka svitla za Marjan zašla, kad se ijade ruku diglo i mavalo s Rive a bilo ih je dokle ti se pogled dobacija, kad se porat zaorija pismon o galebu i suncu ča se zemji smije, kad je stotinu brodica zamaklo za lanternu na Đigi, kad je more na škinu zadnji put diglo svoga raspivanoga sina, Split se konačno moga pozdravit s Oliveron.
Svitu splitski, svitu dalmatinski, šta se to sinoć zbilo? Jesmo li plakali ili se radovali, jesmo li pljeskali ili pivali, je li nan bilo vruće ili su nas prošli studeni ježuri, jesmo li trkali za dicon ili slikavali, jesmo li ćakulali ili gorke suze prolivali ka jedan brko kraj mene na šentadi, jesmo li ovo ikad do...