Lito je na vrhuncu i opet je udrila žega, pari se čoviku da će se sve zapalit: asfalt, beton, kamen i zemlja.
Grad je pun do čepa i ne more više progucat ni svita, ni auta, ni buke, a ni škovaca.
Vikendon je posebno grozno, a navečer sve provali i izriga vanka, skoro da ćemo se i podavit. Ne triba bit inspektor, a nije nužno ni da vas u životu ide zapažanje detalja, dovoljno je samo proć centron grada i škovace vas počnu same bost u oko.
I ne samo to, reka bi da će brzo počet same iskakat i gađat nas u facu. Čovik je slika i posla, a vi vidite na šta to sliči, priko Rive i Marmontove, kroz pjace i pjacete, da ne nabrajamo...
Prazne plastične boce, kartonske kutije od pizza, kartončići od pizzeta, masnoga papira, omota od sladoleda, svake vrste ambalaže, prazne limenke, kese, korneti, okrajci lepinja... A, svega, ne fali ni tičjega mlika...
I sad, iz naše dobre i vridne gradske komunalne firme “Čistoće” uvik govore da čiste grad više puta dnevno, a jasno je i da neće po jedan škovacin bit požarni uz svaku kantu cili dan, ali isto je ovo previše, recite...
A i gazde kioska i lokala brze spize isto su mogli očistit isprid svoga, baš isprid njih su krcate kante, puknit će još malo...
D.T.